أنا هنا بتكلم تحديداً عن الكورسات الأونلاين اللى هي عبارة عن فيديوهات (video-based courses). لو أنت شغال ف منصة من اللي بتقدم الكورسات دي فممكن تكون اتسألت من الـ SME السؤال ده "هو انت ليه عايزني اكتب اسكربت، ما تسيبني قدام الكاميرا كده وأنا هرتجل متقلقش؟"

مبدأيا متسببهوش يعمل كده (لو أنت صاحب القرار)، ولو الشركة بتعمل كده فى الوقت الحالي ابعتلهم البوست ده أو اعملهم منشن، أو اتناقش معاهم بعد ما تقرأ البوست (ده لو اقتنعت طبعاً):

ايه اللي ممكن يحصل نتيجة الارتجال:

1. أول حاجة وأسوأها على الاطلاق هي التأتهة (آآآ، اممم، اننن) حاجات زي دي بتضايق المتعلم جدا وبتخليه يحس انه بيضيع وقته قدام واحد مش محضر كويس، والنتيجة أنه مبيكملش الفيديو ويدور على مصدر تاني للمعلومة.
2. أنت عندك learning objective للفيديو، وبالشكل ده غالباً المحاضر بيخرج عن الهدف من الفيديو وبيقول معلومات مفيش داعي لذكرها (nice-to-know) وبالتالي المحاضر بيقول المعلومات المهمة مع غير المهمة وتبص فى الأخر تلاقي الفيديو مش مركز على هدف محدد ومش قادر يحقق الهدف ده..
3. نتيجة رقم 2 (المعلومات غير المهمة)، مدة الفيديو بتزيد (بدون داعي) وبالتالي ده مزعج للمتعلم وممكن ميكملش الفيديو (مش عشان الفيديو طويل بس ولكن عشان مفيش الزُبد=الخلاصة)..
4. ونتيجة زيادة طول الفيديو بتتصرف فلوس أكتر، لأن المونتاج هياخد وقت أكتر، والـ QA (مراجعة الفيديو) هتاخد وقت أطول، والتيم كله هياخد وقت أطول وده معناه انتاجية أقل وفلوس أكتر.. كمان وقت التصوير نتيجة الارتجال هيكون أطول لأن هيكون فيه أخطاء ونسيان وتوتر، ….، …والخ.
5. نتيجة برضه رقم 2، أنت مش هتعرف تصمم تجربة تعلم صح؟! أنت هتقيم التعلم (level 2: learning) بناء على ايه!!.. أنت ممكن أصلا تكون عامل التقييم من قبل تصوير الفيديو.. لكن فى الحالة دي احتمال كبير تكون فيه أسئلة اجابتها مش فى الفيديو نتيجة الارتجال.. طاب نعمل الأسئلة بعد الفيديو.. طبعا لأ؟! كده أنت بتقيم المحتوى اللى المحاضر قاله مش الهدف اللى أنت عايز تحققه.. وبالتالي ممكن المتعلم يجاوب أسئلة ملهاش علاقة بالهدف من تجربة التعلم دي أصلاً..

الخلاصة ان كتابة الاسكربت مهمة للشركة اللى بتنتج المحتوى ده عشان تحافظ على فلوسها وتصرفها بحكمة.. ومهمة للمصمم التعليمي عشان يتأكد من بناء تجربة تعلم فعالة تحقق الهدف منها.. أتمنى تكون دي أسباب كافية ليك أو للشركة اللى بتشتغل فيها انها تتخلى عن الارتجال.. ولو عندك أسباب تانية لأهمية كتابة الاسكربت، ممكن تشاركها فى التعليقات.